Ақтөбе облысының Темір ауданындағы «КМК Мұнай» мұнай өндіру компаниясының қызметкерлері мемлекет басшысы Қасым-Жомарт Тоқаевқа жалақыларын арттыруға қатысты көмек сұрап хат жолдады, деп хабарлайды «ҚазТАГ» ақпараттық ресурсы.
Мұнайшылардың айтуынша, олар өздерінің тікелей басшылығына адал еңбекпен тапқан жалақысын арттыруды сұрады. Алайда, компания жалақыны көтеруден бас тартты, дегенмен жұмысшылардың айтуынша, оған компанияның мүмкіндігі бар.
«Біз жыл сайын мұнай өндіру жоспарларын асыра орындаймыз, алайда жұмысшылардың жалақысы басқа мұнай компанияларымен салыстырғанда өте төмен», — деді наразы жұмысшылар.
Сондай-ақ, «ҚМК Мұнай» қызметкерлері Ақтөбе облысының билігіне көмек сұрап жүгінді, алайда нәтиже жоқ. Осыған байланысты мұнайшылар ереуілге шығып, Қасым-Жомарт Тоқаевқа хат жолдады.
Ереуілге шыққан жұмысшылар Президенттен туындаған жағдайға назар аударуды және оның оң шешілуііне ықпал етуді сұрайды.
«Біздің барлық талаптарымыз заңды. Құрметті Қазақстан Республикасының Президенті Қасым-Жомарт Кемелұлы! Біздің ұжымдық мәселемізді шешіп, компанияға тексеріс жіберуіңізді сұраймыз», — деп сұрады мұнайшылар.
Сурет: kaztag.info
