Бүгінде Қазақстанда азаматтарды әлеуметтік қорғау мен қамтамасыз етудің ұлттық моделі қалыптасты. Бұл туралы ҚР Премьер-министрі Асқар Мамин мәлімдеді, деп «ҚазАқпарат»ХАА тілшісі хабарлайды.
«Басты бағыт еңбекке ынталандыру, аз қамтылған азаматтардың табыстарын есепке алуға және мемлекеттік қолдау мөлшеріне қатысты ашықтық пен әділдікті қамтамасыз ету болды. Кедейлер мен тұрмысы төмен азаматтарға көрсетілетін әлеуметтік көмектің негізгі түрлеріне материалдық-экономикалық көмек (жәрдемақы, біржолғы төлемдер), әлеуметтік-тұрмыстық көмек (Коммуналдық қызметтерге ақы төлеудегі жеңілдіктер мен өтемақылар), коммуникативтік-психологиялық көмек (психологиялық консультация беру), кәсіби-еңбек көмегі (кәсіптік қайта даярлау және бағдарлау, жұмысқа орналастыру) жатады», — деп Асқар Мамин депутаттық сауалға берген жауабында жазды. Оның айтуынша, әлеуметтік көмек көрсетудің негізгі қағидаты еңбекке қабілетті отбасы мүшелерінің жұмыспен қамту шараларына міндетті түрде қатысуы және олармен әлеуметтік келісімшарт жасасу болып табылады. «Сонымен қатар, өткен жылдан бастап 4 және одан да көп кәмелетке толмаған балалары бар көп балалы отбасыларға табыстарына қарамастан, отбасындағы балалар санына байланысты сараланған мөлшерде төленетін жаңа мемлекеттік жәрдемақы жұмыс істейді. 1 жастан 18 жасқа дейінгі аз қамтылған отбасылар қатарындағы балалар үшін оқу орны бойынша тегін тамақтануды, қалалық қоғамдық көлікте жеңілдікпен жүруді, мектеп формасымен және керек – жарақтармен қамтамасыз етуді, мектеп жасына дейінгі балалар үшін азық-түлік жиынтықтарымен және гигиеналық керек-жарақтармен қамтамасыз етуді көздейтін кепілдендірілген әлеуметтік пакет енгізілді. Сонымен қатар, мемлекет басшысының тапсырмасына сәйкес, Үкімет әлеуметтік кодекс тұжырымдамасы аясында Кедейлікті жоюдың жаңа шараларын әзірлеуде», — деп Премьер-министр атап өтті. «Бұл шаралар кедейлік шегінің мөлшерін ең төменгі күнкөріс деңгейіне дейін кезең-кезеңімен арттыруға (24 011,4 теңгеден 34 302 теңгеге дейін), аз қамтылған отбасылар қатарындағы жаңа туған балалар үшін жиынтықтармен қамтамасыз етуге, кепілдік берілген әлеуметтік пакет пен жұмыспен қамту шараларын бере отырып, шартты ақшалай көмекке арналған мерзімдерді шектеуге бағытталатын болады. Осылайша, үкімет үздік халықаралық тәжірибелер негізінде халықтың әлеуметтік осал топтары үшін әлеуметтік қорғау тетігін жыл сайын жетілдіріп отырады», — деп А.Мамин түйіндеді.
