2020 жылдың қорытындысы бойынша ҚР Еңбек және халықты әлеуметтік қорғау министрлігі Әлеуметтік-еңбек саласындағы қызметтердің 91% — ын цифрландырды. Бұл туралы ЕХӘҚМ кеңейтілген алқа отырысында ведомство басшысы Серік Шапкенов мәлімдеді.
Серік Шапкенов өз сөзінде 2020 жылдың қорытындысы бойынша ЕХӘҚМ Әлеуметтік-еңбек саласын цифрландыру бойынша айтарлықтай нәтижелерге қол жеткізгенін атап өтті.
«Біз қызметтердің 91% — ын цифрлауды қамтамасыз еттік, 44 қызметтің 40-ы электронды түрде көрсетіледі, оның 18-і белсенді. 2020 жылдың қорытындысы бойынша 12,4 млн қызмет көрсетілді, оның ішінде электрондық — 7,8 млн қызмет. Мемлекет басшысының тапсырмасына сәйкес 2021 жылы зейнетақы мен жәрдемақы тағайындау процестері цифрланатын болады», – деді министр.
Ол сондай-ақ ЕХӘҚМ көрсетілетін қызметтердің сапасын арттыруға және сыбайлас жемқорлық тәуекелдерін төмендетуге ықпал ететін әлеуметтік қызметтер порталын дамытуды жалғастыратынын хабарлады. Порталда оңалтудың техникалық құралдары мен қызметтерінің тізбесі біртіндеп кеңеюде, тауарлар мен арнаулы әлеуметтік қызметтерді жеткізушілердің саны өсуде, ал 2023 жылдан бастап ресурсқа инватакси қызметтері ауыстырылатын болады.
«Сондай-ақ, біз отбасының цифрлық картасын жасау бойынша жұмыс істеп жатырмыз. Жоба қиын өмірлік жағдайдағы отбасыларды автоматты түрде анықтауға бағытталған, бұл азаматтарға әртүрлі мемлекеттік органдардың құзыретіне кіретін әлеуметтік қолдаудың белсенді кешенді шараларын көрсетуге мүмкіндік береді. Отбасының сандық әлеуметтік картасы отбасының әл-ауқатын болжай алады. Осылайша, жүйе ондағы алгоритмнің арқасында азаматтардың көмек сұрауын күтпей, олардың өмір сүру сапасын жақсартуға және азаматтардың әлеуметтік осал санаттарын кемсітуді болдырмауға көмектеседі», — деп толықтырды Серік Шапкенов.
Бұдан басқа, ЕХӘҚМ электрондық еңбек биржасы порталын жетілдіру бойынша жоспарлы жұмыс жүргізуде. Ресурста жұмыспен қамту орталықтарының қызметтерін ұсынатын жаңа сервистер іске қосылды. Облыс орталықтарының, облыстық, республикалық маңызы бар қалалардың және Астананың тұрғындары үшін жұмыс іздеп жүрген адамдарды және жұмыссыздарды тіркеу, мемлекет субсидиялайтын жұмыс орындарына жіберу (Әлеуметтік жұмыс орындары, қоғамдық жұмыстар, жастар практикасы), ерікті қоныс аударуға жәрдемдесу сияқты қызметтерді қашықтықтан көрсету мүмкіндігі берілді.
2020 жылдың қараша айынан бастап 14,5 мыңнан астам адам қашықтықтан қызмет алу мүмкіндігін пайдаланды. 11,7 мың қазақстандық жұмыссыз мәртебесін алды. Мемлекет субсидиялайтын жұмыс орындарына 3,4 мың адам жіберілді. 1,6 мыңнан астам жұмыссыз жұмысынан айырылған жағдайда әлеуметтік төлемдер алуға өтінімдер жіберді, олардың 80% — ы мемлекеттік әлеуметтік сақтандыру қорымен мақұлданды.
2020 жылы портал арқылы 629 мыңнан астам адам жұмысқа орналастырылды, олардың 66% — ы тұрақты жұмыс тапты.
Сурет: inform.kz
