Қазақстанда қаржы секторын дамытудың 2030 жылға дейінгі Тұжырымдамасын қабылдау жоспарланып отыр. Бұл туралы Үкімет отырысында ҚР Премьер-министрі Асқар Мамин мәлімдеді.
Министрлер Кабинетінің басшысы Қаржы нарығын дамыту үшін қаржы секторын дамытудың 2030 жылға дейінгі тұжырымдамасын қабылдауды көздейтінін атап өтті.
«Қаржы жүйесінің тұрақтылығын және экономиканың өсуін қамтамасыз ету қажеттілігін ескере отырып, нарықтық тетіктер негізінде экономиканы банктік кредиттеуді едәуір кеңейту бойынша шаралар қабылданатын болады», — деді Асқар Мамин.
Премьер сондай-ақ, экономикалық өсудің ұзақ мерзімді әлеуетін дамыту үшін бәсекеге қабілетті шикізаттық емес секторға негізделген экономиканың жаңа құрылымын қалыптастыруды ынталандыру, қосылған құнның өңірлік және жаһандық тізбектеріне енгізу жөніндегі жұмыс жалғастырылатынын қосты.
«Экономиканың сапалы және тұрақты дамуы үшін жағдай жасайтын, жаңа экономикалық шындық жағдайында халықтың өмір сүру сапасы мен әл — ауқатының артуымен қатар жүретін түбегейлі жаңа институционалдық қаңқа қалыптастырылатын болады», – деп Асқар Мамин атап өтті.
Сурет: inform.kz
