ҚР Премьер-министрі Асқар Мамин нақты тұтыну бағаларының өсу индексін, сондай-ақ жалақының өсу индексін ескере отырып, ынтымақты зейнетақыны индекстеу мүмкіндігіне түсініктеме берді.
“Ынтымақты зейнетақы жыл сайынғы индекстелуіне инфляция деңгейінен 2% – ға артық кепілдік берілетін төлем болып табылады. Нақты тұтыну бағалары мен жалақының өсу индексі өткен кезеңдегі нақты деректер негізінде қалыптастырылады, ал ынтымақты зейнетақының өсуі кезінде тиісті қаржы жылына арналған инфляция назарға алынады. Осыған байланысты нақты тұтыну бағаларының өсу индексін, сондай — ақ жалақының өсу индексін ескере отырып, яғни өткен кезеңнің көрсеткіштерін ескере отырып, зейнетақыларды жыл сайын индекстеу мәселесін қарау орынды болып табылмайды”, – деп Асқар Мамин депутаттық сауалға берген жауабында жазды.
Сонымен қатар, зейнеткерлердің материалдық жағдайын арттыру мақсатында қазіргі уақытта зейнетақымен қамсыздандыруды жаңғырту бойынша, бірінші кезекте базалық зейнетақыны ең төменгі кепілдендірілген зейнетақыға айналдыру арқылы жұмыс жүргізілуде.
“Ең төменгі кепілдендірілген зейнетақыны тағайындау тетігі базалық зейнетақыны тағайындаудың қолданыстағы әдістемесіне негізделетін болады, бірақ белгілі бір параметрлерді жетілдіре отырып. Бұл шара ең төменгі мөлшерді ең төменгі күнкөріс деңгейінің 54% — ынан 70% – ға дейін арттыруды, қатысудың ең төменгі өтілін 10 жылдан 5 жылға дейін азайтуды, сондай-ақ ең жоғарғы шектеуді алып тастауды көздейді (қазіргі уақытта ең жоғарғы шектеу 33 жыл және одан жоғары өтілі кезінде 1 ПМ құрайды)”, – деп Премьер-министр атап өтті.
“Сонымен қатар, жаңғыртудың маңызды бағыттарының бірі 2023 жылы жұмыс берушінің міндетті зейнетақы жарналарын енгізу болып табылады. Жоспарланған шаралар елімізде және әлемде қалыптасып отырған экономикалық жағдайды, Әлеуметтік және демографиялық факторларды, сондай — ақ Мемлекет басшысының зейнетақы жүйесін жаңғыртуға қатысты берген бірқатар тапсырмаларын толық көлемде ескереді”, – деп А.Мамин түйіндеді.
Сурет: inform.kz
