Ағымдағы жылдың басынан бері еліміздің Әскери-теңіз күштері корабльдерінің тобы Каспий теңізінің қазақстандық секторының акваториясында 27 жорықты жүзеге асырды. Жеке құрам 6000-нан астам теңіз милін жүріп өтті. Бұл туралы Ақтау гарнизонының баспасөз орталығының бастығы Нұрбол Шалабаев айтты.
Осы айдың басында Каспийде әскери-теңіз күштерінің бөлімдерімен командалық-штабтық оқу-жаттығулар аяқталды. Оларды контр-адмирал бас қолбасшы Сәкен Бекжанов басқарды.
Оқу-жауынгерлік тапсырмаларды орындау үшін кемелердің тактикалық тобы теңізге шықты. Әскери теңізшілер шартты жауға еліктейтін жер үсті әуе нысандарына кеме-жауынгерлік атыстар жасады. Оқу-жаттығуларға әскери авиация бөлімшелері де қатысты.
Командалық-штабтық оқу-жаттығулар басқару органдарының, корабль командирлерінің даярлық деңгейін анықтауға, сондай-ақ жауынгерлік іс-қимылдар барысында қатысушылардың қолда бар дағдылары мен өзара байланысын пысықтауға мүмкіндік берді.
Жоғары моральдық-психологиялық деңгей мен мықты жауынгерлік рухтың арқасында жаттығулар кезінде қойылған міндеттер орындалды.
Сондай-ақ жақында «Қазақстан», «Орал», «Сарыарқа» және «Маңғыстау» зымыран-артиллериялық корабльдері кірген Қазақстан Республикасы Әскери-теңіз күштері корабльдерінің тобы Каспий теңізінің қазақстандық секторының акваториясында жиын-жорық өткізді.
Сурет: casp-geo.ru
