Қазақстандық ғалымдардың аса қауіпті ауруларға қарсы вакциналық препараттарды әзірлеуде үлкен тәжірибесі мен әлеуеті бар. Бұл туралы ҚР Білім және ғылым вице-министрі Мирас Дәуленов мәлімдеді, деп хабарлайды «ҚазАқпарат» ХАА.
«Институт ғалымдары әлемде алғашқылардың бірі болып денсаулық сақтау үшін жоғары патогенді шошқа тұмауына қарсы вакцина ойлап тапты. Қазақстандық құс тұмауына қарсы вакцинаның арқасында еліміздің ауыл шаруашылығы 2006 жылы құс басының 95%-ын сақтап қалды. 2019 жылы бруцеллезбен күресу үшін жаңа векторлық вакцина әзірленді, ол қауіпсіздігі мен иммунобиологиялық қасиеттері бойынша осы ауруға қарсы қолда бар вакциналардан едәуір асып түседі. 2020 жылы ғалымдар қысқа мерзімде жеделдетілген режимде түйе шешегіне қарсы вакцина жасады. 2020 жылдың мамыр айында институт коронавирус инфекциясына қарсы отандық QazCovid-in вакцинаны әзірледі, ол қазір клиникалық сынақтардың III соңғы кезеңінен өтуде», — деп түсіндірді Мирас Дәуленов.
