Білім және ғылым министрлігі сегіз жоғары оқу орнының қызметін тексереді. Бұл туралы ҚР БҒМ басшысы Асхат Аймағамбетов Мәжіліс депутаттарының сауалына берген жауабында мәлімдеді, деп хабарлайды “ҚазАқпарат” ХАА тілшісі.
“Ағымдағы жылы министрлік сегіз жоғары оқу орнының қызметін тексеруді жоспарлап отыр, оның барысында олардың активтерінің жай-күйі зерделенетін болады”, – делінген жауапта.
Білім министрі бір мезгілде министрлік мемлекеттік мүлік жөніндегі уәкілетті органмен бірлесіп, ЖОО-лардың жарғыларына жылжымайтын мүлікті, оның ішінде жер телімдерін иеліктен шығару мәселесін ЖОО-лардың Директорлар кеңесінің құзыретіне жатқызу бөлігіне өзгерістер енгізу мәселесін пысықтап жатқанын айтты.
“Бұл бақылауды күшейтуге және жоғары оқу орындарының активтерін иеліктен шығару жағдайларының алдын алуға мүмкіндік береді деп ойлаймыз”, — деп атап өтті Асхат Аймағамбетов.
Жоғары оқу орындарының директорлар кеңесі корпоративтік шешімдер қабылдауда ашықтықты қамтамасыз ету үшін құрылғанын атап өткен жөн. Директорлар кеңесінің құрамына Қазақстан Республикасы Парламентінің депутаттары, білім беру саласының көрнекті қайраткерлері және тәуелсіз сарапшылар енгізілді. Осы мақсатта конкурстар өткізу арқылы жоғары оқу орындарының ректорларын тағайындаудың ашық жүйесі енгізілді.
“Жалпы, жоғары оқу орындары қызметінің тиімділігі мен ашықтығын арттыру мәселелері министрліктің тұрақты бақылауында”, — деп түйіндеді министр.
