ҚР Білім және ғылым министрлігінің басшысы Асхат Аймағамбетовтың бейнеконференция байланысы арқылы еліміздің басқа мемлекеттердегі елшіліктерінің өкілдерімен кездесуі өтті, деп хабарлайды Білім министрлігінің баспасөз қызметі.
Бейнеконференцияға Ресей Федерациясындағы, Катардағы, Малайзиядағы, Сингапурдағы, БАӘ, Австралиядағы, Өзбекстандағы, Қырғызстандағы және басқа елдердегі дипломатиялық өкілдіктер мен консулдықтардың қызметкерлері қосылды.
Онлайн-кездесу барысында еліміздегі жоғары білім беру жүйесін интернационалдандыру бойынша халықаралық ынтымақтастықты дамытуға байланысты мәселелер қарастырылды.
Сондай-ақ, бейнеконференцияға қатысушылар Қазақстанға шетелдік ғалымдар мен білім беру саласына инвестиция тарту жөнінде пікір алмасты.
Академиялық ұтқырлықты дамыту және “Болашақ” бағдарламасын жаңғыртуға қатысты мәселелер де назардан тыс қалмады.
Қазақстан елшіліктері өкілдерінің алдында сөйлеген сөзінде Асхат Аймағамбетов бүгінгі таңда біздің республикамызда білім беру саласындағы халықаралық ынтымақтастықты дамыту мәселелерін қамтитын 20 келісімге қол қоюға дайындалып жатқанын айтты.
Білім министрлігінің басшысы Қазақстан бұл құжаттарға таяу және алыс шетелдермен келісімге келуге ниетті екенін айтты.
Сурет: Liter.kz
