Қарағанды облысы бойынша экология департаменті басшысының орынбасары Азамат Бектасов Балқаш мыс балқыту зауытына жүргізілген жоспардан тыс тексеру туралы айтты, деп хабарлайды kursiv.kz ақпарат ресурсы.
Тексеру Балқаш тұрғындарының қаладағы ауаның ластануының жоғары деңгейіне шағымданған өтініштерінің көп болуына байланысты жүргізілді.
Тексеру қорытындысы бойынша зауыттың шаң-газ тазалау жабдығының тозуына байланысты тиімсіз жұмыс істейтіні анықталды. Нәтижесінде түтін газының бір бөлігі шатыр терезелері арқылы қоршаған ортаға шыққан.
Сонымен қатар, тексерушілер мыс балқыту зауыты металлургиялық қондырғылардың жұмысын дұрыс бақыламайтынын анықтады.
Бектасовтың айтуынша, анықталған бұзушылықтарға байланысты Балқаш зауытының басшылығына 400 айлық есептік көрсеткіш — бір миллион теңгеден астам айыппұл салынды. Сонымен қатар, ағымдағы жылдың желтоқсан айының соңына дейін барлық кемшіліктерді жоюды міндеттейтін ұйғарым берілді.
«Қазақмыс» корпорациясына тиесілі зауыттың басшылығы қолданылған жазалармен келісті, алайда бұзушылықтар бойынша түсініктеме берген жоқ.
Сурет: inform.kz
