Елордалық мемлекеттік қызмет істері агенттігі департаментінің басшысы Жандос Сәрсенов еліміздің 4,5 мыңнан астам азаматы президенттік жастар кадрлық резервіне өтініш бергенін хабарлады.
Жандос Сәрсенов осы жылдың қыркүйек айынан мемлекеттік қызмет істері агенттігінде өтінімдер қабылдау басталғанын еске салды.
“Қатысушылардың құжаттарын қабылдау үшін құжаттар жинаудың автоматтандырылған pkrezerv.kz. онлайн-платформасы іске қосылды.Құжаттарды қабылдау 30 қыркүйекке дейін жалғасады. Президенттік жастар кадрлық резервіне іріктеуге қатысушыларға қойылатын негізгі талаптар – Қазақстан Республикасының азаматтығы, жасы 35-ке дейін, жоғары білім және 5 жылдан кем емес жалпы жұмыс өтілі”, – деді Сәрсенов.
Сондай-ақ, астаналық департамент басшысы іріктеудің ашықтығын қамтамасыз ету үшін өтінім берген қатысушылар туралы ақпарат қолжетімді болатынын атап өтті.
“Президент тағайындайтын саяси мемлекеттік қызметшілерді қоспағанда, талаптарға сәйкес келетін барлық азаматтар резервке іріктеуге қатыса алады. Сонымен қатар, үміткерлер мемлекеттік қызметке кіру шарттарына сәйкес тексеруден өтеді. Іріктеу бірнеше қарапайым дәйекті кезеңдерден тұрады және кандидаттардың теориялық білімдерін, көшбасшылық қасиеттерін, стратегиялық көзқарасын, уәждемесі мен құндылықтарын бағалауға бағытталған”, – деп қорытындылады ведомство басшысы.
Сурет: 24.kz
