Бельгияның астанасында конференция өтті, оның басты мақсаты – Еуропалық Одақ пен Орталық Азия аймағы елдері арасындағы қарым-қатынастарды нығайтуға қатысты мәселелерді талқылау.
Шараға депутаттар, саясаткерлер, ғалымдар, сондай-ақ Еуроодақ және Орталық Азия елдерінің, оның ішінде Қазақстанның дипломаттары,сонымен қатар, біздің еліміздің Бельгиядағы Төтенше және Өкілетті Елшісі Айгүл Құспан қатысты.
Конференция барысында Еуропалық Одақ пен Орталық Азия арасындағы ынтымақтастықты арттырудағы Қазақстанның рөліне ерекше назар аударылды. Сарапшылар біздің еліміз Орталық Азия аймағының кеңістігінде аса маңызды ел болып табылатынын және онсыз Еуроодақтың ОА-мен ынтымақтастығын елестету мүмкін еместігін атап өтті.
Конференцияға қатысушылардың алдында сөйлеген сөзінде Азия зерттеулер институтының директоры Сұлтан Әкімбеков Қазақстан Еуроодақты тек экономикалық және геосаяси жағынан ғана емес, сонымен қатар өзінің адами капиталымен де қызықтыратынын атап өтті.
Осы институт директорының айтуынша, Қазақстан Республикасының стратегиялық рөлі Батыс-Шығыстың да, Солтүстік-Оңтүстіктің де қиылыстарын біріктіруі болып табылады.
