Қазақстандық сауда министрлігі басшысының орынбасары Қайрат Төребаев Беларусь әмбебап тауар биржасы басқармасының төрағасы Александр Осмоловскиймен кездесіп, оның барысында ынтымақтастықты дамытуға қатысты мәселелер талқыланды, деп хабарлайды “Қазақпарат” ақпарат агенттігі.
Беларуссияда өткен біздің еліміздің сауда-экономикалық миссиясында қазақстандық сауда вице-министрі Беларусь әмбебап тауар биржасы арқылы Қазақстан Республикасының экспортын ілгерілетуге мүдделі екендігін мәлімдеді.
Өз кезегінде Александр Осмоловский Қазақстан компанияларын Беларусь әмбебап тауар биржасына қатысуға шақырды. Ол биржа өкілдері біздің республикамызға жұмыс сапарымен келіп, өзінің қызметі туралы егжей-тегжейлі баяндауға дайын екенін айтты.
Кездесу соңында Қазақстан сауда министрлігі мен Беларусь әмбебап тауар биржасы арасында қазақстандық экспортты үшінші елдердің нарығына жылжытудағы ынтымақтастық туралы келісімге қол жеткізілді.
Қазақстан Сауда министрлігі хабарлағандай, өткен жылы отандық компаниялар Беларусь әмбебап тауар биржасы арқылы 5,6 миллион долларға өнім сатқан.
Сурет: inform.kz
