Ұшағы еліміздің оңтүстік астанасы маңында апатқа ұшыраған Bek Air әуе тасымалдаушысының басшысы Нұрлан Жұмасұлтанов әуе апатына қатысты журналистердің кейбір сұрақтарына жауап берді.
Жұмасұлтанов егер қазақстандық премьер-министр Асқар Мамин басқаратын Үкіметтік комиссия қайғылы оқиғаға әуе компаниясы кінәлі деген қорытындыға келсе, не болады деген сұраққа жауап берді.
Авиакомпания басшысының айтуынша, авиатасымалдаушы апатқа кінәлі деп танылған жағдайда, жазаны жеке басына алады.
«Егер Bek Air-ден біреу жазалануы тиіс деген мәселе туындаса, мен жаза алуға дайынмын. Мен келіп, шын жүректен мойындауға дайынмын — мені отырғызыңыз, басқа ешкімге тиіспеңіз», — деді Жұмасұлтанов.
Бұған дейін Нұрлан Жұмасұлтанов авиациялық оқиғалар мен жанжалдарды тексеру жөніндегі қазақстандық басқарманың басшысы лауазымында еңбек етті, алайда қарамағындағылардың біріне қылмыстық іс жүргізіліп, соның салдарынан атқаратын лауазымынан кетті.
Қазір үкіметтік комиссия Алматы облысындағы әуе апатын тергеумен айналысуда. Президент Тоқаевтың тапсырмасына сәйкес, ол осы жылдың 8 қаңтарына дейін тергеуді аяқтауы, ал 10 қаңтарға дейін атқарылған жұмыстың қорытындысы туралы баяндауы қажет.
