Президенттің Жарлығы бойынша келесі жылдың 10 қаңтарында біздің елімізде Мәжіліс пен мәслихаттар сайлауы өтуі тиіс. Коронавирус індетін ескере отырып, Денсаулық сақтау министрлігі сайлауда инфекцияның таралуына жол бермеу бойынша ұсыныстар дайындады. Ол туралы Денсаулық сақтау вице-министрі, республиканың бас санитарлық дәрігері Ерлан Қиясов толығырақ айтып берді.
Ол кандидаттарды ұсыну және тіркеу кезеңінде алдағы сайлауға қатысушылардың барлығы бетперде режимі мен әлеуметтік қашықтықты сақтау, сонымен қатар бір рет қолданылатын қолғаптар мен антисептиктерді қолдану ұсынылатынын мәлімдеді.
Партия съездері, конференциялар мен түрлі отырыстар алдында Денсаулық сақтау министрлігі барлық қатысушылардың дене қызуын байланыссыз термометрлердің көмегімен өлшеуді ұсынады.
Осындай іс-шараларды өткізуге арналған залдарда жасанды желдету жүйесі болуы тиіс. Егер ол жоқ болса, бөлмелерді үнемі желдетіп отыру керек.
Мұндай залдарда жиһаздарды бір-бірінен кемінде 1,5-2 метр қашықтықта орналастыру керек. Сайлау құжаттарын толтыру және оларға қол қою кезінде жеке қаламдарды пайдалану ұсынылады.
Бұған дейін Орталық сайлау комиссиясы барлық ресми тіркелген партияларға алдағы сайлауға қатысуға рұқсат бергені туралы хабарланған. Біздің елімізде олар алтау — Nur Otan, «АҚ жол» Демократиялық партиясы, Жалпыұлттық социал-демократиялық партиясы, «Ауыл» саяси партиясы, Қазақстанның Коммунистік Халық партиясы және «Бірлік» партиясы. Соңғы екеуі жақында аттарын өзгертіп, ҚКХП Халықтық партияға, ал «Бірлік» — «Адал» партиясына айналды.
Сурет: 24.kz
