Республикамызға танымал журналист Михаил Козачков Нұр-Сұлтан қаласының дене шынықтыру және спорт басқармасының бастығы Самат Ерғалиев карантин ережелерін бұзғаны үшін жауапқа тартылғанын хабарлады, деп жазады “ҚазТАГ” ақпарат ресурсы.
Казачковтың айтуынша, елорда әкімдігінің шенеунігі медициналық бетпердесіз жиналыс өткізген, яғни халықтың санитарлық-эпидемиологиялық салауаттылығы саласындағы заңнаманың, сондай-ақ гигиеналық нормативтердің талаптарын бұзған.
Осындай әрекеттері үшін Ерғалиев 319 мың теңгеден астам айыппұл түріндегі жаза алды.
Сонымен қатар Самат Ерғалиевке дейін дене шынықтыру және спорт басқармасының басшысы лауазымында қызмет еткен Нұрлан Сыдықов өткен жазда сыбайлас жемқорлық қылмыс жасады деген күдікпен ұсталды.
Сыбайлас жемқорлыққа қарсы қызметтің мәліметінше, Сыдықов 10 миллион теңге пара алды деген күдікке ілінді. Тергеу мәліметтері бойынша, ол мердігерден 2020 жылы Наурыз мерекесін ұйымдастыру бойынша қызмет көрсету кезінде көрсеткен қамқорлығы үшін ақша алған.
