Әзірбайжан республикасының астанасында Түркі кеңесіне қатысушы мемлекеттер басшыларының жетінші саммиті басталды,оған Қазақстанның Тұңғыш Президенті Нұрсұлтан Назарбаев қатысуда.
Түркі кеңесіне қатысушы мемлекеттер басшыларының саммитіне Түркия президенті Реджеп Тайип Эрдоған, Әзірбайжан президенті Ильхам Әлиев және Қырғызстан президенті Сооронбай Жээнбеков,сонымен қатар, түркі тілдес мемлекеттердің ынтымақтастық кеңесінің толыққанды мүшесі ретінде тұңғыш рет Өзбекстан көшбасшысы Шавкат Мирзиеев қатысуда.
Түркі тілдес мемлекеттердің ынтымақтастық кеңесі саммитінің басты тақырыбы «Шағын және орта бизнесті дамыту» болып табылады.
Саммитте түркі ынтымақтастығы ұйымдарын реформалау туралы тұжырымдаманың жобасы бекітіледі деп жоспарлануда. Бұл жобаны Қазақстанның бастамасы бойынша Түркі кеңесіне қатысушы елдер әзірледі.
Түркі тілдес мемлекеттердің ынтымақтастық кеңесі 2009 жылдың 3 қазанында Қазақстанның Тұңғыш Президенті Нұрсұлтан Назарбаевтың бастамасымен құрылды. Оның құрамына Қырғызстан, Түркия, Қазақстан, Әзірбайжан кіреді және ресми түрде Өзбекстан қосылды.
Сурет: inform.kz
