Бакудегі бизнес-конференцияны өткізу кезінде Қазақстан Республикасының Әзірбайжандағы Төтенше және Өкілетті Елшісі Сержан Әбдікәрімов Әзірбайжан кәсіпкерлеріне еліміздің іскерлік ахуалы мен инвестициялық әлеуеті туралы хабарлады . Бұл туралы «Қазақпарат»ақпарат агенттігі хабарлайды.
Caspian European Club аймақтық бірлестігі ұйымдастырған іс-шараға «Бакинский халықаралық теңіз сауда порты» ЖАҚ бас директоры Талех Зиядов, Caspian European Club қызметкерлері және т. б. қоса алғанда, әр түрлі саладан Әзірбайжан іскер ортасының 60-тан астам өкілі қатысты.
Қазақстандық дипломат біздің республикадағы тартымды инвестициялық климат, кәсіпкерлікті жүргізу мүмкіндіктері, заңнамалық деңгейде қолдау және инвесторлар үшін енгізілген жеңілдіктер мен преференциялар, Kazakh Invest Ұлттық компаниясының жұмысы, Қазақстанның 13 арнайы экономикалық және 24 индустриалды аймағында жұмыс істеу шарттары туралы хабарлады. Сонымен қатар, Әбдікәрімов қонақтарды «Астана»халықаралық қаржы орталығының қызметімен таныстырды.
Оның айтуынша, екіжақты әріптестіктің жоғары деңгейіне қарамастан, Қазақстан Республикасы мен Әзірбайжан арасындағы өзара тауар айналымының көлемі мен құрылымын талдау екі елдің үлкен экономикалық әлеуеті толық жүзеге асырылмай отырғанын көрсетеді. Бұл үшін сауда-экономикалық ынтымақтастықты жандандыру үшін қосымша шаралар қабылдау жоспарланып отыр.
Дипломат осы шаралардың орындалуы тауар айналымын және өзара инвестициялар деңгейін арттыруға, сондай-ақ іскерлік байланыстарды нығайтуға мүмкіндік беретініне сенім білдірді. Ол әзірбайжандық бизнесмендерді Қазақстан Республикасындағы белсенді инвестициялық және іскерлік жұмысқа шақырды.
Caspian European Club-қа Каспий-Қара теңіз және Балтық аймағы елдерінің аумағында қызмет ететін әлемнің 70 елінен 5000-нан астам компания мен ұйымдар қатысады.
Сурет: lenta.inform.kz
