Бүгінгі күннен бастап Байқоңыр қаласында коронавирусқа байланысты бұрын енгізілген кейбір карантиндік шаралар қолданылуы тоқтатылды. Бұл туралы “Қазақпарат” ақпарат агенттігі хабарлады.
Байқоңырда күшейтілген санитарлық режиммен қоғамдық тамақтану объектілерінің жұмысына рұқсат етілді, алайда мұндай жерлерде салтанатты немесе отбасылық іс-шараларды өткізуге тыйым салынады.
Сондай-ақ, қалада қашықтық талаптарын сақтай отырып, спорт объектілеріне қызметін жүргізуге рұқсат етілді. Сонымен қатар Байқоңырда ашық далада қоғамдық сипаттағы іс-шараларды өткізуге рұқсат етілді.
Қазір Байқоңырда эпидемиологиялық жағдай тұрақты. Қалада коронавирусқа 276 адам тексерілді, оның ішінде тек біреуінде ғана диагноз расталды.
Қала әкімшілігі басшысының қаулысында көрсетілгендей, Байқоңырда жоғары дайындық режимі ағымдағы жылдың 1 маусымына дейін сақталады.
Бүгінгі таңда Қазақстанда коронавирусты жұқтырудың 7597 оқиғасы ресми түрде тіркелді, олардың ең көп саны Алматыда – 2001 жағдай анықталды.
Сурет: inform.kz
