Талдықорған әуежайына Біріккен Араб Әмірліктерінен 135 отандасымызбен ұшақ келіп қонды. Бұл туралы “Қазақпарат” ақпарат агенттігі хабарлайды.
Әуежайға келгеннен кейін қазақстандықтар алғашқы медициналық тексеруден өтті, кейін Талдықорған және Текелі стационарларына карантинге орналастырылды.
Талдықорған қаласының әкімі Н. Қанатұлы келген барлық азаматтардан коронавирустық инфекцияға талдау жасалғанын айтты. Сонымен қатар, ол талдықорғандықтарды осы мәселе бойынша алаңдамауға шақырды, өйткені барлық қабылданған қауіпсіздік шаралары жоғары деңгейде.
Бұған дейін Алматы облысының әкімдігінде Талдықорған әуежайы БАӘ-ден қазақстандық ұшақ күтіп отырғанын айтқан болатын.
Облыстық атқарушы билік органының ақпараты бойынша, біздің отандастарымыздың БАӘ-ден оралуы мәселесі республикалық штабпен келісілді. Сонымен қатар, келген отандастармен барынша аз байланыс жасауды қамтамасыз ететін арнайы алгоритмі әзірленді.
