БҰҰ-ның қылмыстың алдын алу және қылмыстық сот төрелігі жөніндегі 14-ші конгресі барысында Киотода (Жапония) БҰҰ-ның қылмыс және есірткі жөніндегі басқармасы (ЕҚБ) терроризм мен экстремизмнен зардап шеккен балаларды қарау мәселелері бойынша ұйымдастырған арнайы іс-шара өтті. Сессияда Қазақстан СІМ Ерекше тапсырмалар жөніндегі Елшісі Талғат Қалиев сөз сөйледі, деп «ҚазАқпарат» ХАА ҚР СІМ баспасөз қызметіне сілтеме жасап хабарлайды.
Қазақстан сыртқы саяси ведомствосының өкілі «Жусан» және «Русаф»арнайы гуманитарлық операциялары шеңберінде Сирия мен Ирактан келген балаларды репатриациялау жөніндегі елдің тәжірибесін атап өтті. Белгілі болғандай, кезекті осындай операцияның қорытындысы бойынша ағымдағы жылдың ақпан айының басында Отанына тағы 7 бала қайтарылды. «Қазіргі уақытта еліміздің мемлекеттік органдары бұл балаларға әр балаға жеке — жеке әзірленген психологиялық және білім беру қолдау бағдарламалары аясында кешенді көмек көрсетуді жалғастыруда», — деп Т.Қалиев атап өтті. Осыған байланысты БҰҰ ЕҚБ және басқа да халықаралық серіктестерге қазақстандық балаларды оңалту мен реинтеграциялауға көмектескені және еліміздің осы салада тәжірибе алмасуға әзірлігі үшін алғыс білдірілді. БҰҰ ЕҚБ өкілдері Қазақстанның Таяу Шығыстағы жауынгерлік қақтығыс аймақтарында қалған балаларды қайтару және реинтеграциялау ісінде әлемдік көшбасшылардың бірі болып табылатынын атап өтті. Іс-шара барысында Еуропалық Одақ, Индонезия, Ирак, Нигерия және Жапонияның кәмелетке толмағандарды террористік және экстремистік әрекетке тартудың алдын алуға және оған қарсы тұруға бағытталған бастамалары талқыланды.
