Қазақстан Үкіметі басшысы Асқар Мамин «Бәйтерек» Ұлттық басқарушы холдингі» АҚ директорлар кеңесінің кезекті отырысын өткізді. Бұл туралы ҚР премьер-министрінің баспасөз қызметі хабарлады.
Отырыста холдингтің инвестициялық саясатының талаптарын орындау мәселелері талқыланды. Сонымен қатар, тараптар холдингтің ағымдағы қызметін қарастырды.
Іс-шара барысында 2018 жылдың қорытындысы бойынша даму институтының жылдық есебі, даму жоспары мен жылдық бюджетінің орындалуы туралы есептер бекітілді.
Бұдан басқа, отырыс барысында холдингтің корпоративтік басқаруын дамытудың 2019-2020 жылдарға арналған іс-шаралар жоспары бекітілді. Бұл жоспар корпоративтік басқаруды одан әрі жетілдіру бойынша 47 іс-шарадан тұрады.
Директорлар кеңесінің мүшелері компанияның корпоративтік басқару кодексіне өзгерістер мен толықтыруларды алдын ала талқылады, сондай-ақ 2019 жылдың ІІ тоқсанына холдингтің ішкі аудит қызметінің есебін бекітті және тауарларды сатып алу ережелеріне кейбір өзгерістер енгізді.
