9 маусымда, жексенбі күні республика азаматтары жаңа президент таңдайды.
Мемлекет басшысын сайлау алдындағы күн тыныштық күні деп аталады. “Қазақстан Республикасындағы сайлау туралы” Қазақстан Республикасының Конституциялық заңына сәйкес, сайлау күні және оның алдындағы күні кез келген сайлау алдындағы үгіт жүргізуге тыйым салынған. Бұл үгіт-насихат жұмыстарының барлық түрлеріне қатысты: тыныштық күні теледидардан сайлауалды роликтерді көрсетпейді, парақшалар таратпайды, сайлаушылармен кездесулер өткізбейді.
Сайлау алдындағы үгіт жергілікті уақыт бойынша сағат 00:00-де аяқталуы тиіс.
Бұл ретте бұрын сайлау комиссияларының үй-жайларынан және дауыс беруге арналған үй-жайлардан тыс орналастырылған баспа үгіт материалдары өз орындарында қалады. Бұрын интернетте орналастырылған үгіт материалдары да сақталады. Бұрын орналастырылған материалдарды интернет-ресурстардың басты беттеріне шығаруға болмайды.
Қазақстанда кезектен тыс президенттік сайлау күні, 2019 жылғы 9 маусымда, учаскелік сайлау комиссияларында дауыс беру, егер дауыс берудің басқа уақыты белгіленбесе, жергілікті уақыт бойынша сағат 07:00-ден 20:00-ге дейін өтеді.
Дауыс беру елдің барлық аумағы бойынша және одан тыс жерлерде 9 968 сайлау учаскесінде өтеді.
2019 жылғы 1 қаңтардағы жағдай бойынша Орталық сайлау комиссиясы Қазақстан Республикасының сайлаушылар тізіліміне дауыс беру құқығына ие 11 814 019 азаматты енгізді.
Дауыстарды санау және дауыс беру нәтижелері туралы хаттама жасау сағат 20:00 басталады және дауыстарды санау басталғаннан бастап 12 сағаттан аспайды.
Әкімшілік-аумақтық бірліктер бойынша дауыстарды санау нәтижелері аумақтық комиссиялардың отырыстарында белгіленеді және хаттама жасалған күннен бастап екі күн мерзімде-11 маусымнан кешіктірілмей ҚР ОСК-ға жеткізіледі.
Сайлау қорытындыларын анықтау және жариялау, Қазақстан Республикасының сайланған Президентін тіркеу үшін ҚР Орталық сайлау комиссиясына жеті күн – 2019 жылғы 16 маусымнан кешіктірмеу көзделген.
Қазақстан Республикасы Президентін сайлау қорытындылары туралы есепті сайлау өткізілген күннен бастап 10 күннен кешіктірмей – 19 маусымнан кешіктірмей, кандидаттардың сайлау қорларына түскен ақшаның жалпы сомасы туралы және ақшалай қаражат көздері – сайлау қорытындылары шыққаннан кейін 10 күн ішінде – 2019 жылдың 29 маусымынан кешіктірмей бұқаралық ақпарат құралдарында жарияланады.
