Қазақстан Сыртқы істер министрлігінің басшысы Мұхтар Тілеуберді бейнеконференция форматында БҰҰ Бас хатшысының орынбасары – Контртеррористік басқарманың басшысы Владимир Воронковпен келіссөздер жүргізді. Бұл туралы ҚР СІМ хабарлады.
Бейне кездесу шеңберінде қатысушылар контртерроризм саласында ынтымақтастықты жолға қою, оның ішінде Қазақстан тарапының бастамасы бойынша әзірленген терроризмнен азат әлемге қол жеткізу үшін мінез-құлық кодексін ілгерілету жөніндегі жоспарларды қарастырды.
Сонымен қатар, тараптар әскери қақтығыстар аумағынан оралған адамдарды, әсіресе кәмелетке толмағандарды оңалту және реинтеграциялау мәселелерінде Қазақстанның озық тәжірибесін ілгерілетуге бағытталған ортақ жобаларды іске асыруды талқылады.
Біріккен Ұлттар ұйымының өкілі Қазақстанның халықаралық терроризмге қарсы күрес саласындағы жұмысын, сондай-ақ Сирия мен Ирактан отандастарының оралуына бағытталған «Жусан» және «Русаф» гуманитарлық операцияларының нәтижелерін жоғары бағалады.
Қазақстан тарапы Орталық Азия өңірі елдерінде БҰҰ-ның Жаһандық терроризмге қарсы стратегиясын іске асыру, сондай-ақ осы ұйымның Алматы хабы негізінде өңірлік әріптестікті нығайту жөніндегі өңірлік іс-қимыл жоспарының төртінші кезеңін әзірлеуге және жүзеге асыруға белсенді қатысуды жоспарлап отыр.
Сурет: gov.kz
