Сыбайлас жемқорлыққа қарсы іс-қимыл агенттігі Ақмола облысы бойынша “ҚазАвтоЖол” ҰК” филиалының қызметінде сыбайлас жемқорлық қаупінің анықталғаны туралы ақпарат берді.
Сыбайлас жемқорлыққа қарсы ведомствоның ақпараты бойынша, облыста тексеріс жүргізілді, тексеріс барысында филиал басшысының орынбасары бұрын сыбайлас жемқорлық сипатындағы қылмыс жасағаны үшін жауапқа тартылғаны анықталды.
“Басқарма араласқаннан кейін соңғысы мемлекеттік қызметтен кетті. Сонымен қатар, филиал қызметінде филиал қызметкерлерінің жетекшілік ететін объектілерге шығуына тиісті бақылаудың болмауы, мердігерлермен тікелей байланыс жасау, жол бойындағы белдеулерде жол сервисі объектілерін орналастыру бойынша “жасырын” қызмет көрсету және нормативтік-құқықтық актілермен регламенттелмеген техникалық шарттар беру сияқты бірқатар сыбайлас жемқорлық қауіп-қатері белгіленді”, – деп хабарлады сыбайлас жемқорлыққа қарсы қызмет.
Агенттік Ақмола филиалында сыбайлас жемқорлыққа қарсы қатерлерді жою үшін тиісті шаралар қабылданатынын атап өтті.
