Қазақстан Республикасы Индустрия және инфрақұрылымды дамыту министрлігі Азаматтық авиация комитеті төрағасының орынбасары Айбек Әлжанов PrimeMinister.kz сайтына берген сұхбатында отандық азаматтық авиацияның дамуы туралы айтты.
А. Әлжановтың айтуынша, азаматтық авиацияда әуежайларда қызмет көрсетілген жолаушылар мен тасымалданған жолаушылар саны бойынша саланың негізгі көрсеткіштерінің тұрақты өсуі байқалады.
“Отандық әуежайларда қызмет көрсетілген жолаушылар саны бойынша шамамен 24% – ға өсіп отырмыз. Мысалы, 2015 жылы 12 млн жолаушы болды, өткен жылы біздің әуежайлар 15 млн жолаушыға қызмет көрсетті. Биыл 8 ай ішінде ҚР әуежайларында қызмет көрсетілген жолаушылар саны 11 млн 800 мың жолаушыны құрады, бұл өткен жылдың көрсеткіштерінен жоғары”, — деп Комитет төрағасының орынбасары хабарлады.
Сонымен қатар, 2018 жылдың қорытындысы бойынша тасымалданған жолаушылар саны 1,3 есеге артты. Тасымалданған жолаушылардың жалпы саны ағымдағы жылдың 8 айында 5,6 млн адамды құрады, бұл өткен жылдың сәйкес кезеңімен салыстырғанда 1,8% – ға артық. А. Әлжановтың айтуынша, өсім жаңа маршруттардың ашылуымен және жаңа авиакомпаниялардың іске қосылуымен байланысты.
Тұңғыш Президент – Елбасының “Қазақстанның Үшінші жаңғыруы: жаһандық бәсекеге қабілеттілік” Жолдауын орындау шеңберінде 2018 жылы транзиттік авиажолаушылар саны 900 мың адамды құрады, бұл 2017 жылғы көрсеткіштен 45% – ға артық 2019 жылдың 8 айында транзиттік авиажолаушылар саны 642 мың адамды құрады. Алдын ала болжам бойынша транзиттік авиажолаушылар саны 1,6 млн адамды құрайды.
Бұдан басқа, “Нұрлы Жол” мемлекеттік бағдарламасы 2025 жылға дейін жергілікті әуе желілерінің 16 әуеайлағын салу және қайта жаңарту көзделген (Павлодар облысында – Баянауыл, Шығыс Қазақстан-Үржар, Зайсан, Үлкен Нарын, Алматы – Үшарал, Батыс Қазақстан-Жәнібек, Сайқын, Казталов, Атырау – Құлсары, Миялы, Сүйіндік, Қарағанды-Қарқаралы, Ұлытау, Түркістан – Сарыағаш, Қостанай – Арқалық, Ақтөбе – Шалқар).
А. Әлжанов соңғы жылдары 30-дан астам елмен нормативтік-құқықтық базаны құру және кеңейту, сондай-ақ рейстерді жаңарту және ашу, оның ішінде басым бағыттар бойынша келіссөздер жүргізілгенін атап өтті.
Ағымдағы жылы бірқатар шетелдік авиакомпанияларға тікелей әуе қатынасын ашу мүмкіндігін қарастыру ұсынысымен хаттар жіберілді. Сонымен, тиісті хаттар “American Airlines”, “United Airlines”, “Delta Air Lines” (Америка Құрама Штаттары), “Cathay Pacific” (Гонконг), “Alitalia” (Италия), “Iberia” (Испания) және KLM (Нидерланды) мекенжайларына жіберілді.
Азаматтық авиация комитеті routes Silk Road-2019 форумы аясында белсенді жұмыс жүргізді. Форум аясында Қытайдың ірі авиакомпанияларының бірі – China Eastern Airlines, сондай-ақ Urumqi Airlines Қытай бюджеттік авиакомпаниясымен өзара түсіністік туралы меморандумдарға қол қойылды.
