“СҚ-Фармация” ресми порталында “Халықтық бақылау” деп аталатын жаңа бөлім пайда болды. Оның арқасында азаматтар елімізге келген гуманитарлық көмек туралы ақпарат ала алады, деп хабарлайды “ҚазАқпарат” жаңалықтар ресурсы.
“СҚ-Фармация” өкілдерінің айтуынша, жаңа бөлім азаматтардың қай елден Қазақстанға ізгілік көмек жеткізілгенін, сондай-ақ гуманитарлық жүктің медициналық мекемелер арасында қалай бөлінгенін білуі үшін құрылған.
“Бөлімдегі деректер күнде жаңартылады. Гуманитарлық көмек туралы барлық ақпарат – жөнелтілу, жеткізілу мерзімдерінен бастап, саны мен соңғы алушыларға дейін – енді ашық болады. Бөлімде көмекті алған өңірлер де, медициналық ұйымдар да көрсетілген екі кестені көруге болады “- деп хабарлады “СҚ-Фармация”.
Сонымен қатар, “СҚ-Фармация” өкілдері компанияда қазір қоғамдық кеңес құру мәселесі белсенді пысықталып жатқаны айтып өтті.
Еліміздің сыртқы саяси ведомствосының мәліметтеріне сәйкес, індеттің таралуы кезеңінде біздің елімізге Ресей Федерациясынан, Өзбекстаннан, Үндістаннан, Пәкістаннан, Катардан және тағы да басқа мемлекеттерден гуманитарлық көмек жеткізілді.
