ҚР Парламенті Сенаты Әлеуметтік-мәдени даму және ғылым комитетінің кеңейтілген отырысында депутаттар «Қазақстан Республикасының Үкіметі мен Еуропалық ядролық зерттеулер жөніндегі ұйым (CERN) арасындағы ғылыми-техникалық ынтымақтастыққа қатысты халықаралық ынтымақтастық туралы келісімді ратификациялау туралы» заң жобасын қарады, деп ҚазАқпарат хабарлайды.
Өз сөзінде ҚР Энергетика вице-министрі Сұңғат Есімханов Қазақстанның атом саласы одан әрі даму үшін перспективалы болып табылатынын атап өтті.
«Ғылыми-техникалық саладағы біздің адами капиталымыз бүгінгі таңда ядролық физика мен қолданбалы зерттеулер саласындағы маңызды міндеттерді шешуге қабілетті. Ғылыми ядролық әлеуетті дамытудың арқасында Қазақстан бүгінде қолданбалы ядролық физика, ядролық және радиациялық технологиялар саласында өз бетінше жұмыс істеуге қабілетті елдер қатарында. Бұл бізге әлемнің ең дамыған мемлекеттерімен тең дәрежеде жұмыс істеуге мүмкіндік береді», — деді Сұңғат Есімханов.
Вице-министр халықаралық ұйымдармен ынтымақтастық пен бірлескен жобаларға қатысу академиялық қоғамдастықтың ғылыми әлеуетін біріктіруге мүмкіндік беретінін айтты. Осы мақсатта 2016 жылы ҚР Президенті Қасым-Жомарт Тоқаевтың бастамасы бойынша Еуропалық ядролық зерттеулер ұйымымен (CERN) ынтымақтастықты нығайту басталды.
«Тек әлемдік елдермен күш біріктіріп қана жоғары энергия физикасы мен бөлшектер физикасы саласында жемісті зерттеулер жүргізуге болады», — деп Сұңғат Есімханов қосты.
Сурет: readtiger.com
