БҰҰ-ның Женевадағы бөлімшесі жанындағы еліміздің тұрақты өкілі Жанар Айтжанова халықаралық электр байланысы одағының бас хатшысы Хоулинь Чжаомен кездесу өткізді,деп хабарлайды Қазақстанның сыртқы саяси ведомствосының баспасөз қызметі.
Кездесу барысында Жанар Айтжанова бас хатшыға Қазақстан президенті Қасым-Жомарт Тоқаевтың ел халқына Жолдауының негізгі аспектілері туралы баяндады.
Хоулинь Чжао қазақстандық дипломатты тыңдап, мемлекет басшысының Жолдауында қойылған міндеттер Қазақстанның ақпараттық-коммуникациялық технологияларына халықаралық инвестицияларды ынталандыратынын атап өтті. Сонымен қатар, ол халықаралық одақ біздің елмен одан әрі ынтымақтастыққа мүдделі екенін мәлімдеді.
Сондай-ақ, кездесу барысында бас хатшы байланыс саласындағы өңірлік достастықтың әкімшілік басшылары кеңесінің 55-ші отырысына және Қазақстанның шақыруы бойынша ақпараттандыру жөнінде ТМД-ға қатысушы елдердің Үйлестіру кеңесінің 25-ші отырысына қатысатынын атап өтті.
Кездесу соңында Хоулинь Чжао жоғарыда аталған іс-шаралар кезінде Қазақстан Республикасының өкілдерімен бірқатар кездесулер өткізуді жоспарлап отырғанын айтты.
