Бүгін, 12 сәуір, посткеңестік елдер ғарышкерлер күнін атап өтуде және осы оқиғаға байланысты Қазақстанның тұңғыш ғарышкері Тоқтар Әубәкіров тағы бір қазақстандық ғарышқа ұша ма деген пікірімен бөлісті.
Тоқтар Әубәкіров орбитаға тағы бір қазақстандық ұша ма, жоқ па нақты айта алмайды, бірақ ғарышқа ұшуға мүмкіндігі бар ресейлік қазақ бар екенін айтты.
Сөз болып отырған адам – Қызылорда облысында дүниеге келген, жақында Ресей азаматтығын алған 53 жастағы Мұхтар Аймаханов. Ол 2014 жылдан бастап Росғарыштың ғарышкерлер жасағының сынаушы-ғарышкері.
“Ол қазір Гагарин атындағы Ғарышкерлерді даярлау орталығында дайындалып жатыр. Бірақ ол сыни жаста . Оны ұшыра ма, жібермей ме мен білмеймін. Оның ұшуы үшін көп нәрсе жасадым. Ұшпаса, маған өте өкінішті болады. Өте ақылды жігіт”, – деді Тоқтар Әубәкіров.
Сондай-ақ, Қазақстанның тұңғыш ғарышкері Тұңғыш Президент Нұрсұлтан Назарбаевтың ғарышқа ұшу ұсыныстарынан неге бас тартқанын айтты.
“Мен екі рет бас тарттым. Бірінші рет Нұрсұлтан Назарбаев маған 1985 жылы ұсынды. Мен ұшқыш-сынаушы болғандықтан, бос болмадым. 1990 жылы қайтадан өзіне шақырды. Мен: жоқ, мен ұшып жүрмін- дедім”, – деді Тоқтар Әубәкіров.
Бірақ 1991 жылдың 2 қазанында Тоқтар Әубәкіров ресейлік және австриялық ғарышкерлер Александр Волков және Франц Фибекпен бірге ғарышқа көтерілді. Ол “Мир” орбиталды кешенінің бортында жұмыс істеді. Сол жылдың 10 қазанында ол Жерге оралды.
