Қазақстанның Сыртқы істер министрлігі кеше Стамбул қаласында қазақстандық экспорттаушылардың сауда-экономикалық миссиясы өткендігін хабарлады.
Осындай ауқымды іс-шараны ұйымдастыруға Қазақстанның Түркиядағы елшілігінің, еліміздің индустрия және инфрақұрылымдық даму министрлігінің, Қазақстан Республикасының “Атамекен” Ұлттық кәсіпкерлер палатасының, Қазақстанның сыртқы сауда палатасының және Түркияның сауда палаталары мен тауар биржалары одағының өкілдері қолдау көрсетті.
Қатысушылар іс-шара барысында сауда қызметін дамыту, атап айтқанда біздің еліміздің экспорттық және инвестициялық мүмкіндіктері, бизнесті жүргізу шарттары, экспорттаушылар мен шетелдік инвесторларды мемлекеттік қолдау шаралары бойынша мәселелерді қарастырды.
Іс-шарада Қазақстанның Түркиядағы елшісі Абзал Сапарбекұлы сөз сөйледі. Ол Түрік Республикасы Қазақстан Республикасының басты сауда серіктестерінің бірі екенін хабарлады.
Сонымен қатар, іс-шара барысында Түркі сауда-өнеркәсіп палатасы мен Қазақстан-Түрік бірлескен палатасының алғашқы отырысы өтті.
