Алматы облысының Талғар шатқалындағы Богатырь мұздағынан тікұшақтың көмегімен Ресей туристерін қауіпсіз жерге көшірді. Бұл туралы ҚР Ішкі істер министрлігі төтенше жағдайлар комитетінің ресми өкілі Нұрсұлтан Нұрахметов хабарлады.
Ресейлік алты турист Сол Талғар шатқалының бойымен жорыққа шыққан. Бүгін “ҚР ІІМ ТЖК РЖҚЖ” ММ-ның жедел кезекші пультіне туристердің біреуі ауыр жарақат алып, өздігінен жүре алмайтындығы туралы хабар түсті.
Төтенше істер комитеті туристерді жорыққа жіберер алдында арнайы есепке алып, құтқарушылар олардың бағытын білгенін атап өтті. Уақыт пен маршрутты есептей отырып, құтқарушылар туристердің Богатырь мұз айдынында екенін анықтады. Олар тұрған жерге дейін басқа көлікпен жету қиын болғандықтан,тікұшақ жіберу туралы шешім қабылданды.
Оқиға орнына келген құтқарушылар алғашқы медициналық көмек көрсетіп, Үлкен Алматы шатқалындағы тікұшақ алаңына дейін туристер тобын эвакуациялады.
Зардап шеккен адам ауруханаға жеткізілді. Мұзға сәтсіз түсу нәтижесінде туристің иық буынын шығып, дәрігерлердің алдын ала тексеруіне сәйкес миы шайқалған.
Сурет: Kaztag.info
