Қазақстан Сыртқы істер министрлігінің басшысы Бейбіт Атамқұлов Корея Республикасына ресми сапармен барды.Бұл туралы ҚР сыртқы саяси ведомствоның баспасөз қызметі хабарлады.
Бейбіт Атамқұлов ресми сапары аясында Корея басшылығымен, атап айтқанда, премьер-министр Ли Нак Енмен, ұлттық ассамблеяның спикері Мун Хи Санмен, БҰҰ экс-бас хатшысы Пан Ги Мунмен, сондай-ақ сыртқы істер министрі Кан Ген Хвамен және сауда, индустрия және энергетика министрі Сон Юн Момен бірқатар кездесулер өткізді.
ҚР Сыртқы істер министрлігінің ақпараты бойынша, алғашында Бейбіт Атамқұлов Корей Үкіметінің басшысымен кездесу өткізіп, саяси диалогты қолдауға қатысты мәселелерді талқылады.
«Корея Республикасы біз үшін Азиядағы негізгі стратегиялық серіктестердің бірі болып табылады және біз саяси өзара іс – қимылымыздың деңгейі осы деңгейге сәйкес келетінін ризашылықпен атап өтеміз», — деді Атамқұлов.
Сондай-ақ, Қазақстанның Сыртқы істер министрі Корея премьер-министрін еліміздің маңызды ішкі саяси үдерістері туралы хабардар етті.
Бұдан кейін ҚР сыртқы саяси ведомствосының басшысы Корея Ұлттық Ассамблеясының спикерімен кездесті. Әңгіме барысында тараптар парламентаралық байланыстар мәселелерін талқылап, оларды нығайту қажет деген ортақ пікірге келді. Сонымен қатар, Еуразия елдері Парламенттері спикерлерінің «Үлкен Еуразия: Диалог. Сенім. Серіктестік» тақырыбына өтетін 4-ші кеңесіне дайындық барысы қаралды.
ҚР СІМ БҰҰ бұрынғы Бас хатшысы Пан Ги Мунмен кездесу достық жағдайда өткенін хабарлады. Корей дипломаты еліміздің Тұңғыш Президенті Нұрсұлтан Назарбаевқа жылы лебізін жолдап, оның көрнекті саяси дарынын атап өтті,сондай-ақ Қасым-Жомарт Тоқаевты президенттік қызметке сайлануымен құттықтады.
Қазақстан мен Корея Сыртқы істер министрлерінің келіссөздері барысында өзекті халықаралық мәселелер талқыланды. Кездесу барысында алдағы іс-шаралар кестесі туралы сөз қозғады, «Орталық Азия – Корея Республикасы» атты биылғы жылдың қазан айында біздің елімізде өтетін форумға дайындық барысын талқылады.
Кореяның сауда, индустрия және энергетика министрімен кездесуде сауда-экономикалық, инвестициялық және технологиялық ынтымақтастық мәселелеріне ерекше назар аударылды. Корей тарапы Қазақстанның инвестициялық ахуалын жетілдіру саясатымен танысты.
ҚР Сыртқы істер министрі Кореяға ресми сапары аясында Kolon, Samsung Electronics, Doosan Heavy Industry, Hyosung Corporation Group және Hyundai Heavy Industries басшылықтарын қоса алғанда, Оңтүстік Кореяның ірі бизнес өкілдерімен бірқатар кездесулер өткізді.
