Қазақстан Республикасы Сыртқы істер министрлігінің басшысы Мұхтар Тілеуберді Біріккен Ұлттар Ұйымы Бас хатшысының орынбасары және БҰҰ-ның 75-жылдығын мерекелеуге дайындық жөніндегі арнайы кеңесшісі Фабрицио Хохшильдпен кездесу өткізді.
Бұл туралы ҚР Сыртқы істер министрлігінің баспасөз қызметі хабарлады.
Келіссөз барысында тараптар халықаралық күн тәртібіндегі өзекті мәселелер мен БҰҰ-ның 75 жылдығын мерекелеуге дайындық жөнінде пікір алмасты.
БҰҰ Бас Ассамблеясының мерейтойлық сессиясының негізгі тақырыбы цифрландыру және жастарды ілгерілету мәселелері болатыны белгілі болды.
Мұхтар Тілеуберді және Фабрицио Хохшильд президенттік Жастар кадрлық резервін құру және Қазақстанда цифрландыру саласында жүргізіліп жатқан жұмыстар туралы әңгімелесті.
БҰҰ Бас хатшысының орынбасары біздің мемлекетіміздің ұйым қызметіндегі белсенді рөлін жоғары бағалады.
Ол Қазақстан БҰҰ-ға енген сәттен бастап 27 жыл ішінде Ұйым қызметінің барлық бағыттары бойынша жоғары деңгейге қол жеткізгенін мәлімдеді.
Біріккен Ұлттар Ұйымының Жарғысына қол қою 1945 жылдың 26 маусымында өтті.
