Қазақстан Сыртқы істер министрлігінің басшысы Мұхтар Тілеуберді Астана процессінде Түркия әскері жүргізіп жатқан Сириядағы әскери операция туралы мәселені талқылауды ұсынды.
“Сирияда өрбіп жатқан оқиғалар Астана үдерісі өзектілігін жоғалтпайтынын, керісінше, тәртіп орнатуға қатысатын елдерге келіссөздер үстеліне отырып, онда болып жатқан оқиғаларды талқылау қажет екеніне меңзейді.Біз осы алаңды қабылдап, диалогты ұйымдастыруға дайынбыз”, – деді министр.
Сонымен қатар, Қазақстанның сыртқы саяси ведомствосының басшысы Сирия жөніндегі келіссөздердің келесі раунды биылғы жылдың қараша айында еліміздің астанасында өтуі мүмкін екенін атап өтті. Ол әзірге нақты күн белгіленбегенін атап өтті.
“Қазір Сирияның солтүстігінде шиеленістерге байланысты кепілгер елдер арасындағы диалог мәселесі бар. Сондықтан біз олардан өздеріне ыңғайлы күнді белгілеуін күтудеміз”, – деді Мұхтар Тілеуберді.
