Тәжікстан Airbus Helicopters алғашқы тікұшағын сатып алды.Оны құрастырумен “Еврокоптер Қазақстан инжиниринг” ЖШС бірлескен кәсіпорны айналысты. Бұл туралы “Қазақстан инжиниринг “ҰК” АҚ баспасөз қызметі хабарлады.
“Қазақстан инжиниринг “ҰК” АҚ басқармасының төрағасы Қуаныш Бишімов, бүгінгі таңда компания өндірістік қуаттарды өсіру, импорт алмастыру және өзінің экспорттық әлеуетін дамыту бойынша белсенді айналысып жатқанын айтты.
“Осы мәміле Тәжікстанда да, жалпы Орталық Азияда да жаңа нарықтың ашылуына байланысты өте маңызды оқиға болып табылады.Жыл сайын тікұшақтарды жөндеу және техникалық қызмет көрсету, ұшу құрамын оқыту бойынша қызметтердің экспорты өсуде. Жалпы, “Қазақстан инжиниринг “ҰК” АҚ компаниялар тобы бойынша өткен жылмен салыстырғанда арнайы өнім мен қосарлы мақсаттағы өнім экспорты 30%-ға өседі деп күтілуде. Аталған жеткізілім компанияның экспорттық әлеуетін дамыту перспективасын ашады”, – деді Қуаныш Бишімов.
Еурокоптер Қазақстан инжиниринг” – бұл Н145, Н130, Н125 тікұшақтарын құрастыру зауыты.Ол ілеспе қызметтерін, атап айтқанда, ұшу-техникалық құрамды оқыту және техникалық қызмет көрсетеді. Бұл кәсіпорын ТМД және Орталық Азия елдерінде осындай жалғыз кәсіпорын болып табылады.
Сурет: inform.kz
