Барлық күш-жігерді барынша тұрақты ішкі және сыртқы сұранысы бар салаларды қолдауға бағыттау. Бұл туралы ҚР премьер-министрі Асқар Мамин Үкімет отырысы барысында мәлімдеді, деп “ҚазАқпарат” хабарлайды.
“Бүгін біз сыртқы нарықтардағы тұрақсыздықтың жоғары деңгейін байқап отырмыз. Сондықтан барлық күш-жігерді неғұрлым тұрақты ішкі және сыртқы сұранысы бар салаларды, оның ішінде жеңіл, тамақ және химия өнеркәсібін, машина жасау мен фармацевтиканы қолдауға бағыттау керек. Кеңінен қолданылатын отандық құрылыс материалдарының, соның ішінде Шыны, керамика, санфаянс және т.б. өндірісін ұлғайту керек”, — деді Асқар Мамин.
Министрлер Кабинетінің басшысы көмірсутектерге әлемдік бағаның төмендеуі технологиялық күрделі салаларға көшуге баса назар аударатынын айтты. Бұл мұнай-химия және газ өңдеу саласына қатысты.
“Осыған байланысты Индустрия министрлігіне мемлекеттік органдармен және әкімдіктермен бірлесіп, биылғы жылға белгіленген барлық жобаларды іске асырып қана қоймай, Индустрияландыру картасы жобаларының пулын қосымша пысықтап, кеңейтуді, сондай — ақ жаңа ықтимал жобаларды пысықтауды тапсырамын”, – деп атап өтті Асқар Мамин.
