Біздің республикада індетке қарсы күрес жөніндегі шараларды әзірлеумен айналысатын жұмыс тобының отырысы өтті, деп хабарлайды today.kz ақпараттық агенттігі.
Отырыс Қазақстан Денсаулық сақтау министрлігінің басшысы Елжан Біртанов және бас санитарлық дәрігер Айжан Есмағамбетованың қатысуымен өтті.
Кездесу барысында жұмыс тобының мүшелері қазіргі таңда Қазақстанда санэпидқадағалау қызметін нығайту бойынша бірқатар шаралар әзірленіп жатқанын, олардың бірі республиканың бас сандәрігерінің мәртебесін көтеру және өкілеттігін кеңейту ұсынылғанын айтты.
Бас санитарлық дәрігерге Қазақстан Республикасының барлық аумағында шектеу іс-шараларын енгізуге және тоқтатуға өкілеттік беру жоспарланып отыр. Бұл ретте нормативтік-құқықтық акт мемлекеттік тіркелмейді.
Сондай-ақ осы шаралар арқылы Қазақстан шекарасында санитарлық-карантиндік бақылауды күшейту және санэпидқызметтің техникалық жабдықталуын жақсарту ұсынылады.
Соңғы мәліметтерге сәйкес, Қазақстанда коронавирустық инфекцияны жұқтырудың 3551 жағдайы ресми түрде тіркелді, оның ең көп саны — 1140 жағдай Алматыда анықталды.
Сурет: ru.sputniknews.kz
