Мемлекет Басшысы Қасым-Жомарт Тоқаев еліміздің Қарулы Күштері жүйесінен бұрынғы Қорғаныс министрі Сәкен Жасұзақовты Арыс қаласындағы жарылысқа байланысты жұмыстан босатты. Бұл туралы Қазақстан президентінің баспасөз қызметі хабарлады.
“Мемлекет басшысының Өкімімен жүктелген міндеттерді тиісінше орындамағаны және қару – жарақ пен оқ-дәрілердің қауіпсіздігі мен сақталуын қамтамасыз ету, қару-жарақ пен оқ-дәрілерді сақтау объектілерін көшіру және жайластыру бағдарламасын іске асыру жөніндегі жұмыстағы елеулі кемшіліктер Арыс қаласындағы әскери бөлімде оқ-дәрілердің жарылысына және қаладағы адам өліміне әкеп соқты: Қазақстан Республикасының бұрынғы Қорғаныс министрі Сәкен Әділханұлы Жасұзақов Қазақстан Республикасының Қарулы Күштері жүйесінен босатылды”, – деп хабарлады мемлекет басшысының баспасөз қызметі.
Сондай-ақ, Қорғаныс министрінің бірінші орынбасары – ҚР ҚК Бас штабының бастығы Мұрат Бектанов, Қорғаныс министрінің бұрынғы бірінші орынбасары-ҚР ҚК Бас штабының бастығы Мұрат Майкеев, Қорғаныс министрінің бұрынғы орынбасары Талғат Жанжүменов қатаң сөгіс алды.
Сурет: kaztag.info
