Нью-Йорктегі онлайн-конференция барысында БҰҰ Қауіпсіздік кеңесінің мүшелері, сондай-ақ БҰҰ жанындағы басқа елдердің жүзге жуық өкілдері қақтығыс аймақтарынан балаларды қайтару және оларды кейіннен қайта біріктіру бойынша Қазақстан Республикасының тәжірибесін қарастырды. Бұл кездесу қарулы қақтығыстардағы балалардың мәселелеріне, сондай-ақ осы саладағы серіктестікті нығайту жолдарын табуға арналды. Бұл туралы Қазақстан Сыртқы істер министрлігінің порталы хабарлады.
Іс-шараны Қазақстан мен Ресей Федерациясының БҰҰ жанындағы Тұрақты өкілдері және БҰҰ Бас хатшысының балалар мен қарулы қақтығыстар жөніндегі арнайы өкілінің хатшылығы ұйымдастырды.
Конференцияға қатысушылар балаларды қақтығыс аймағынан босату және оларды отанына қайтару бойынша пікір және тәжірибе алмасты. Сонымен қатар, олар балаларды оңалту және қоғамға, әсіресе коронавирустық індет аясында қайта біріктіру кезінде туындайтын қиындықтарды талқылады.
Қазақстанның БҰҰ жанындағы Тұрақты өкілі Мағжан Ілиясовтың айтуынша, біздің еліміз өз отандастарын, ең алдымен балаларын Сирия мен Ирактан қайтару бойынша өткен жылы басталған күш-жігерін жалғастырады. Ол әлеуметтік-психологиялық оңалту бағдарламасының қорытындылары, сондай-ақ “Жусан” және “Русафа”арнайы операциялары аясында Отанына оралған балалар мен әйелдерді қоғамға қайта біріктіру процесінің ерекшеліктері туралы хабарлады.
«Қазақстаннан қашқандардың шамамен 80-85% -ы өз шешіміне өкінеді және өздерін адасқанын мойындайды», – деді тұрақты өкіл.
Сонымен қатар, бейнеконференцияға қатысушыларға “Жусан” операциясы және Сирия мен Ирактан оралған әйелдер мен балаларды оңалту жөніндегі ұлттық бағдарламаның қорытындылары туралы бес минуттық бейнесюжет көрсетілді.
Сурет: inform.kz
