Төрт агломерацияның халқы: Нұр-сұлтан, Алматы, Ақтөбе және Шымкент қалалары мен жақын елді мекендері 1 млн адамға көбейді. Бұл туралы ҚР Ұлттық экономика министрі Руслан Дәленов Үкімет отырысында мәлімдеді, деп ХАА «ҚазАқпарат»тілшісі хабарлайды.
ҰЭМ басшысы өз сөзінде 2014 жылдан бастап жүзеге асырылып жатқан өңірлерді дамыту бағдарламасының бірінші бесжылдығының қорытындысы туралы айтты.
«Жаңа бағдарламада басымдықтар қалалық өсу орталықтарын – төрт ірі агломерацияны және өңірлік урбанизацияланған аймақтарды, сондай-ақ тірек және спутниктік ауылдарды дамытуға бағытталған. Бұл еліміздің барлық өңірлерін дамытуға және өңірлерде өмір сүру сапасын арттыруға мүмкіндік береді. Ресурстарды шоғырландыру экономикалық өсуді арттыруға мүмкіндік береді. Қалаларда, аудан орталықтары мен ауылдарда инфрақұрылымды дамыту үшін өңірлік стандарттар жүйесі енгізіледі», – деді Руслан Дәленов.
Министр сондай-ақ, бағдарламаны жүзеге асыру кезінде моноқалалардағы сумен жабдықтау желілерінің тозуы 10% — ға және электр желілерінің тозуы 12% — ға төмендегенін хабарлады.
«5 жыл ішінде 17 мың маманға «Дипломмен ауылға»бағдарламасы бойынша тұрғын үй сатып алуға жеңілдетілген бюджеттік несие берілді. Ауылдарды абаттандыру бойынша 8 мың жоба іске асырылды. Ауылдарда 700 мың ауыл тұрғындары үшін инфрақұрылым жақсартылды. Аталған шараларға барлығы 252 млрд теңге бөлінді», — деді Руслан Дәленов.
Сонымен қатар, ҰЭМ басшысының айтуынша, сумен жабдықтауды дамыту және тұрғын үй салу бойынша іс-шаралар жүргізілді.
2017 жылдан бастап тұрғын үй құрылысы бойынша іс-шаралар «Нұрлы жер»бағдарламасына біріктірілді.
«2020 жылдан бастап сумен қамтамасыз ету, сумен қамтамасыз ету және ТКШ мәселелері «Нұрлы жер»бағдарламасы аясында жүзеге асырылатын болады. Осы 5 жылда инженерлік инфрақұрылымды дамытуға 1,4 трлн теңге бөлінді», — деді Руслан Дәленов.
