Қарағанды облысының әкімі Жеңіс Қасымбек «АрселорМиттал Теміртау» компаниясын отандық өндірушіге бет бұруға шақырды. Өңір басшысы көрсеткіштерді кем дегенде екі есе ұлғайтуға нақты мүмкіндіктер бар екендігіне сенімді, деп «Қазақпарат» ХАА хабарлайды.
Облыс әкімі бұл мәселені өз қолына алып, айналысуға дайын екендігін мәлімдеді.
Компанияның жергілікті тауар өндірушілерімен ынтымақтастығын нығайтуы үшін облыс әкімдігінде кездесу ұйымдастырылды.
«Бүгін бізде бірқатар мәселелер бар. Өңірдің тауар өндірушілерінде де мәселелер бар. Негізгі мәселе — жергілікті зауыттар шығаратын өнімдерді ірі жүйе құраушы кәсіпорындарға сату. Бүгін арамызда «АрселорМиттал Теміртау» компаниясымен жұмыс істеп жатқан және жеткізу көлемін одан ары арттыра алатын өндірушілер бар. Менің ойымша, осы үстел басында біз қандай да бір ортақ шешімге келе аламыз»,-деді Жеңіс Қасымбек.
Облыс әкімінің тапсырмасымен өнеркәсіп және индустриялық-инновациялық даму басқармасы «АрселорМиттал Теміртау» сатып алуларына егжей-тегжейлі талдау жасады.
«Біз сатып алынған тауарлардың барлық тізімін зерттедік — 20 мыңнан астам атаулы тауар, оның ішінде қазақстандық өндірістің тауар позицияларының үлесіне 3 422, ал жергілікті — 703 болды. Импорт 17 034 тауар түрін құрады», — деді басқарма басшысының міндетін атқарушы Қайрат Шорманбаев.
Талдау көрсеткендей, компания өткен жылы шетелден 70,3 млрд теңгеге тауар әкелген. Облыста шығарылатын өнім 5,2 млрд теңгеге сатып алынды.
Қазақстанның басқа өңірлерінде тауарлар сатып алуға 25,6 млрд теңге жұмсалды. Компания 49 қарағандылық кәсіпорын өнімін сатып алды. Бұл ретте потенциал әлдеқайда жоғары. Облыста өндірілетін тауарлар бар екендігіне қарамастан, компания ұқсас өнімді импорттауды жалғастыруда.
Кездесу диалог алаңы форматында өтті. Әрбір өндіруші өз ойымен бөлісе алды. Әрбір тауар позициясын егжей-тегжейлі қарастырды.
Жергілікті тауар өндірушілердің сұрақтарына келесі компания өкілдері жауап берді: атқарушы директор Вадим Басин және өндіріс жөніндегі директордың орынбасары Мохан Винит.
Өңірлік кәсіпкерлер палатасының директоры Ернар Күлпейісов индустриялық сертификат иелеріне компанияның сатып алуларында преференциялар енгізуді ұсынды. Оның пікірінше, жергілікті өндірушілердің бәсекеге қабілеттілігін металлургиялық кластер арқылы арттыруға болады.
«Мен бұл мәселемен өз қолыма алып айналысамын. Компания бізді түсінуі тиіс, яғни барлық мемлекеттер отандық өнімді алға жылжытады және импортты алмастыру басымдықтарына қояды. Егер осындай шетелдік өнім біздің облыста шығарылатын болса, бағасы мен сапасына сәйкес келсе, біз жергілікті тауарды сатып алуларыңызды талап ететін боламыз, — деп атап өтті Жеңіс Қасымбек. — Бұл жерде салық төлейтін және жұмыс орындарымен қамтамасыз етіп отырған кәсіпорындар. Сіздер Қазақстанда жұмыс істеп жатқандықтан, біздің халқымыз сіздерге қарап отыр, сондықтан өтініш, біздің өндірушілермен жұмыс істеңіз! Біз бұл жерде артық ештеңе сұрамаймыз».
Кездесу барысында компания өкілдері кәсіпорындарға барып, барлық ұсыныстарды қарастырып, зерттеуге келісті. Екі аптадан кейін жаңа кездесу өтеді, онда жергілікті қамту бойынша міндеттемелер алынуы тиіс. Өңір басшысы деңгейді 10-12% — ға дейін көтеруге болады деп санайды.
Жеңіс Қасымбек осындай кездесулер өңірдің барлық жүйе құраушы компанияларымен өтетінін айтты.
Сурет: inform.kz
