Республикамыздың басшысы Қасым-Жомарт Тоқаев Еуразиялық экономикалық одаққа мүше кез келген елде қазақстандықтар зейнетақы төлемдерін ала алатын келісімді ратификациялады, деп хабарлайды “Қазақпарат”ақпарат ресурсы.
Сөз ЕАЭО мемлекеттерінің еңбекшілерін зейнетақымен қамсыз ету туралы келісім туралы болып отыр. Оған өткен жылдың желтоқсан айында Санкт-Петербургте өткен Жоғары Еуразиялық экономикалық кеңестің отырысында қол қойылған.
Еңбек министрі Біржан Нұрымбетовтың айтуынша, осы келісімге сәйкес ЕАЭО-ның барлық елдерінің азаматтары зейнетақы аударымдарына тең құқылы бола алады. Яғни, олар зейнетақыны өздері тұратын одақ мемлекетінің аумағында ала алады, ал Отанына оралған жағдайда бұл ақшаны Ұлттық зейнетақы қорларына аудара алады. Алайда, ол үшін Қазақстан азаматтары Одақтың басқа елінде кемінде бір жыл жұмыс істеуі керек.
Сонымен қатар, біздің республикада зейнетақы ЕАЭО елдерінен келген еңбек мигранттарына Қазақстанның зейнетақы заңнамасында белгіленген тәртіппен және шарттарда қалыптастырылған міндетті зейнетақы жарналары есебінен төленетін болады.
Сурет: visasam.ru
