Қазақстанның Сандық даму министрлігінің мамандары елімізде инновацияларды қолдауға бағытталған заң әзірленгенін айтты. Бұл туралы “Қазақпарат” ақпарат агенттігі хабарлады.
Сөз республикамыздың кейбір заңнамалық актілеріне инновациялық және ғылыми-техникалық даму мәселелері бойынша өзгерістер енгізуді көздейтін заң жобасы туралы болып отыр.
Жаңа заң отандық әзірлеушілерді қолдаудың тиімді экожүйесін әзірлеумен қатар, Қазақстандағы инновациялық белсенділікті арттыруға арналған.
Министрліктің айтуынша, заң жобасын әзірлеуге ондаған сарапшылар қатысты, олар ұзақ жұмыс нәтижесінде 160-қа жуық заңнамалық нормаларды қалыптастырды.
Сонымен қатар, ведомство егер заң қабылданса, онда негізгі өзгерістер мен жаңалықтар технологиялық платформаларды қалыптастыру, корпоративтік инновацияларды дамыту, стартаптар мен инновациялық компанияларды ынталандыру, сондай-ақ ғылыми-техникалық қызметтің тиімділігін арттыру сияқты салаларда іске асырылатынын түсіндірді.
Қазіргі уақытта осы заңның жобасы жария талқылау сатысында, ол осы жылдың 15 қыркүйегіне дейін жалғасады деп жоспарланып отыр.
