Азаматтық авиация комитеті Turkistan International Airport болашақ халықаралық әуежайының нобайын Facebook әлеуметтік желісінде жариялады, деп хабарлайды tengrinews.kz ақпарат агенттігі.
18 мамыр, сенбі күні Түркістан әуе айлағының құрылысы орнында премьер-министр Асқар Маминнің қатысуымен капсула салынды.
Жобаны жүзеге асыру Yota Holding түрік компаниясының қатысуымен өтуде. Компанияның төрағасы Арслан Хусейн әуежай халықаралық стандарттарға сәйкес және жаңа құрылыс технологияларын пайдалана отырып салынатынын айтты. Инвестиция көлемі 70 миллионнан астам долларды құрайды.
Терминал жылына шамамен үш миллион адамды өткізе алады. 2020 жылдың соңына қарай әуежайдан алғашқы рейстер жөнелтілетін болады. 2018 жылдың күзінде әуежай құрылысы үшін Шымкент қаласынан 16 км қашықтықта орналасқан Шаға ауылының маңайынан орын таңдалды.
