Қазақстанның Қарулы Күштері олардың қыс мезгілінде үйренгендерін тексереді. Атап айтқанда, бүкіл ел бойынша армияның жауынгерлік және жедел дайындық деңгейін анықтауға бағытталған бақылау тексерісі өтеді. Бұл туралы Қорғаныс министрлігінің баспасөз қызметі хабарлады.
Тексерудің негізгі мақсаты жауынгерлік даярлықтың ағымдағы жай-күйін анықтау, сондай-ақ әскери бөлімдердің жауынгерлік дайындығын жетілдіруде командирлерге практикалық қолдау көрсету болып табылады.
Ведомствода бөлімшелердің, әскери бөлімдердің қызметшілері негізгі оқу пәндері бойынша, оның ішінде тактикалық, арнайы, атыс дайындығы және басқа да пәндер бойынша емтихандардан өтетіні айтылды.
Құрлық әскерлері Бас қолбасшысының жауынгерлік даярлық жөніндегі орынбасары Дәулет Оспановтың айтуынша, қысқы оқу кезеңінде қазіргі заманғы қарулы қақтығыстар тәжірибесін зерделеуге және талдауға басты назар аударылды.
“Әскерлердің далалық дағдысын жетілдіре отырып, тактикалық буынның бөлімшелері мен әскери басқару органдарының үйлесімділігіне қол жеткізе отырып, практикада жауынгерлік оқудың жаңа нысандары мен әдістерін қолдандық, әскерлерді тиімді қолдану мақсатында жауынгерлік іс-қимылдарды дайындау және жүргізу мәселелерін зерттедік. Бақылау тексерісі командирлер жұмысының нәтижесін қорытындылайды, әлсіз жерлерді анықтауға және практикалық көмек көрсетеді”, – деп атап өтті Оспанов.
Ол комиссиялардың жауынгерлік даярлықтың ұйымдастырылуын жан-жақты тексеретінін, әскери бөлімдерді басқару және бөлімшелердің жауынгерлік дайындық деңгейін бағалайтынын айтты.
