Қазақстан Қорғаныс министрлігінің өкілдері біздің ел делегациясының Ресейдегі «Патриот» конгресс-көрме орталығының аумағында өткен «Армия-2020» халықаралық әскери-техникалық форумына қатысуы туралы айтты.
Қазақстан делегациясын қорғаныс ведомствосы басшысының орынбасары, Қарулы Күштер Бас штабының бастығы Мұрат Бектанов басқарды.
Халықаралық форум аясында Қазақстанның әскери қызметшілері жаңа әскери техникамен танысып, қорғаныс-өнеркәсіп кешенінің ірі өндірушілер өкілдерімен бірқатар кездесулер өткізді.
Іс-шара аясында біздің делегацияға әуе барлау кешендері, ұшқышсыз ұшақтарды анықтау, табу және алып жүрудің жеке жүйелері көрсетілді.
Сонымен қатар, Мұрат Бектанов басқа қазақстандықтармен бірге қолдан жасалған жарылғыш құрылғыларды қашықтықтан анықтау кешенін аралап, қарап шықты.
Форум 23-29 тамыз аралығында өтті. Онда қазақстандық кәсіпорындардың әзірлемелері де ұсынылды.
Атап айтқанда, іс-шарада Киров атындағы зауытта шығарылған қорғалған ноутбуктер мен планшеттер, Семей машина жасау зауыты әзірлеген модификацияланған шынжыр табанды транспортер-тартқыш көрсетілді.
«Армия-2020» форумына қатысушысының бірі құқық қорғау органдары құрылымдары үшін авиациялық жиынтықтаушы бұйымдар мен жеке қорғаныс құралдарын ұсынған «Тыңғыс» зауыты болды.
Сурет: gov.kz
