Инфекцияның таралуының алдын алу мақсатында қазақстандық әскери қызметшілер Атыраудағы қалалық нысандарды дезинфекциялайды, деп хабарлайды “Қазақпарат” ақпарат агенттігі.
Бүгін әскери қызметшілер Атыраудағы ірі сауда орталықтарының аумағын залалсыздандыруды жоспарлап отыр. Дезинфекциялық жұмыстарға “Батыс” өңірлік қолбасшылығының биологиялық қорғау бөлімшелері қатысады.
“Батыс” қолбасшылығының биологиялық қорғау бөлімшесінің өкілі Сафар Фазылов әскери қызметшілер күн сайын Атыраудың 8-ге жуық нысанын дезинфекциялайтынын айтты.
Фазыловтың айтуынша, бүгінгі таңда биологиялық қорғау бөлімшелері атыраулық халыққа қызмет көрсету орталықтары, саябақтар, скверлер мен балалар алаңдарын арнайы ерітіндімен өңдеді.
Сонымен қатар, “Батыс” қолбасшылығының өкілі дезинфекциялық жұмыстар кезінде адамдардың, жануарлар мен құстардың денсаулығына қауіп төндірмейтін “Рубеж” ерітіндісін пайдаланатынын атап өтті.
Дезинфекциялық жұмыстар Атырауда коронавирустық инфекцияның таралу қаупін төмендету және қала тұрғындарының өмір қауіпсіздігін қамтамасыз ету үшін жүзеге асырылуда.
Сурет: 4esnok.by
