Қазақстан Республикасы Парламенті Сенатының депутаты Ерболат Мұқаев Санкт-Петербургте өткен ТМД Парламентаралық Ассамблеясының мәдениет, ақпарат, туризм және спорт жөніндегі тұрақты комиссиясының отырысына қатысты. Бұл туралы Қазақстан Парламенті жоғарғы палатасының баспасөз қызметі хабарлады.
Отырыстың күн тәртібінде сандық дамуға, спортта допингті қолдануға қарсы әрекет етуге және мектеп спортына байланысты модельдік заң жобалары қаралды.
Сондай-ақ, кездесу барысында комиссия мүшелері Достастыққа мүше мемлекеттерде мәдени мұра объектілерін сақтауға бағытталған конвенция жобасын қарады.
Отырыс кезінде оның қатысушылары Арменияның заң шығару қызметінде ТМД Парламентаралық Ассамблеясы қабылдаған модельдік заңнамалық актілердің қолданылу барысымен танысты.
Сонымен қатар ТМД-ға қатысушы елдер Парламентаралық Ассамблеясының Шыңғыс Айтматов атындағы сыйлығын беру мәселесіне де назар аударылды.
Беларусь тарапы бұл сыйлық Беларусьтің еңбек сіңірген қайраткері, жазушы және әдебиеттанушы Владимир Гниломедовқа берілуіне ұсыныс жасады.
Сурет: senate.parlam.kz
