ҚР Парламенті Сенатының депутаты Нұржан Нұрсипатов Премьер-Министрдің орынбасары Ералы Тоғжановқа әскери-патриоттық тәрбие мәселелері бойынша депутаттық сауал жолдады, деп “ҚазАқпарат”ХАА хабарлайды.
“Ұлттық-рухани құндылықтар мен патриоттық сезімге бөленген бала ғана ертең мемлекеттің қауіпсіздігі мен тәуелсіздігі үшін алаңдайды. Ол өз Отанының болашағы үшін жауапкершілікті сезінеді. Әскер қатарында білімді, білікті сарбаз болады. Ол қоғамның мүдделерін бәрінен жоғары қоятын азамат ретінде қалыптасады. Отанды қорғау-Қазақстанның әрбір азаматының парызы. Бұл ең алдымен патриотизмге, әскери-патриоттық тәрбиеге тікелей байланысты”, — деді сенатор.
Нұржан Нұрсипатов 2019 жылды Елбасы жастар жылы деп жариялағанын, сондай-ақ Қазақстан Президенті Қасым-Жомарт Тоқаев жастарды мемлекет тарапынан қолдауға және оларды патриоттық рухта тәрбиелеуге ерекше көңіл бөлетінін атап өтті.
“Бүгінгі таңда жыл сайын әскери қызметке шақырылатын азаматтардың саны 300 мыңға жуық, олардың 40 мыңы ғана әскери қызмет өткеру үшін жарамды. Шақыру алған азаматтардың 25,4% – ы әскери қызметке психологиялық және моральдық тұрғыдан дайын емес. Әскери қызметке шақырудан жалтару әлі де бар”, – деді депутат.
Сондай-ақ, ол үгіт-насихат жұмыстары аясында бағдарламалар, фильмдер шығару, кітаптар шығару, әскери-патриоттық рухты, мәдениетті және ұлттық тарихты насихаттайтын интернет-контент құру, ұлт батырлары, өз ісінің шеберлері болған көрнекті тұлғалар туралы айтып өтті.
Сенатор әскери-патриоттық тәрбие мәселелері қолданыстағы заңнамада бекітілмегенін атап өтті. Депутат мемлекеттік органдардың басты міндеттерінің бірі ретінде әскери-патриоттық тәрбие беру жөніндегі жұмысты заңнамалық бекіту қажеттігін атап өтті.
